धनुषामा थप दुई मारिए

पाँच दिनमा छ जना
जनकपुर, वैशाख १३ (नागरिक)- बालबालिका अपहरण गर्ने प्रयास गरेको आरोपमा धनुषामा स्थानीयले दुई जना मारेका छन्। यही आरोपमा पाँच दिनमा धनुषामा ५ र महोत्तरीमा १ गरी ६ जनालाई स्थानीयले मारिसकेका छन्। एक महिलालाई धनुषाको भरतपुरमा चैत ३० गते जिउँदै जलाएका थिए।
दुहबी गोबराहीमा आइतबार बिहान आठ बजे स्थानीय बेचन मण्डलका भतिजा ७ वर्षीय अमित मण्डललाई अपहरण गर्न खोजेको भन्दै गाउँले उत्रेपछि भएको भिडन्तमा एक पुरुषको घटनास्थलमै मृत्यु भएको छ।
जनकपुर अञ्चल अस्पतालको शवगृहमा राखिएको मृतकको सनाखत हुन सकेको छैन। त्यहाँ सनाखत हुन नसकेको अर्को एक महिलाको शव पनि छ। ती महिलालाई पनि दुहबी-४ मा बच्चा अपहरण गरेको आरोपमा कुटेरै मारिएको हो। उनलाई शनिबार साँझ ७ बजे चार पाँच जनाको संख्यामा आएको समूहले बच्चा अपहरण गर्न लागेको भनी कुटपिट गरेका थिए जसबाट उनको मृत्यु भएको थियो।
यस्तै घटनामा सकि्रय रहेको शंकामा प्रहरीले तीन जनालाई त्यहीँबाट पक्राउ गरी धनुषा प्रहरीलाई बुझाएको छ। सीमा सुरक्षा बल दुहबी चौकीका प्रहरी हवल्दार लालबाबु यादवका अनुसार भारतबाट आएको समूहले रहस्यमय तरिकाबाट सीमा क्षेत्रमा आतंक मच्चाएको हो। पक्राउ पर्नेमा २२ वर्षीय एक युवक र अन्दाजी ४० वर्षीया दुई महिला छन्।
प्रमुख जिल्ला अधिकारी शम्भु कोइरालाले यस्ता घटना बढेको उल्लेख गर्दै प्रभावकारी अनुसन्धान आवश्यक भएको बताए। 'यस्ता घटना निरुत्साहित गर्न मानव अधिकारवादीको सहयोग चाहिएको छ'- उनले भने।
---------nagariknews.com...